أهالي أبو شوارب بالدقهلية محرومون من مياه الشرب منذ أكثر من عام ونصف

أهالي أبو شوارب بالدقهلية محرومون من مياه الشرب منذ أكثر من عام ونصف
كتب -

الدقهلية – ماجد إسماعيل، مي الكناني:

تعاني قرية كفر أبو الشوارب وثلاث قرى مجاورة تابعة لمدينة سندوب بمحافظة الدقهلية، من انقطاع مياه الشرب لمدة عامٍ ونصف، الأمر الذي يضطر الأهالي إلى الاختيار بين طريقين إما خوض رحلة بعربات الكارو أو التوك توك لعزبة التسعين لملأ “جركن” أو زجاجة مياه، الطريقة الثانية هي استخدام طلمبات المياه الجوفية التى يشتبه في تلوثها بمياه الصرف الصحي.

مفيش فايدة

يقول عبد العزيز خليفة -أحد أهالي القرية-: “أنا روحت لرئيس شركة الميه ومعايا مجموعة من الأهالي، ووعدنا بحلها لكن مفيش فايدة، روحناله أكتر من مرة لكن مفيش حل للموضوع ده، وروحنا تانى للشركة الرئيسية ومحدش سأل فينا، كل دا واحنا في الشتاء أومال فى الصيف هنعمل إيه؟! قمة العار في حق أي مسئول مقصر إنه ميوفرش أبسط حقوق المواطن، وبقولها بقلب جامد اللى مش قادر على الكرسي بتاعه يقوم من عليه ويجيب غيره يمكن يحل مشاكل الناس”.

ويضيف حمدى عثمان -أحد أهالي القرية-: “سمعنا حلول كتير من المسؤولين ولكن كل ده فى الآخر يفضل كلام، وأنا بناشد السادة المسؤولين إنهم يتقوا الله فينا”.

22 شهرا بدون مياه

ويقول محمد الحارس –موظف-: “خط المياه مقطوع بقاله 22 شهرا ومحدش من المسؤولين هز وسطه شوية وحل المشكلة، المسؤولين دلوقتي عارفين المشكلة ومفيش جديد، أهالي القرية عملوا طلب عشان نركب خط ميه رئيسي على طريق السنبلاوين، وقالوا عاوزين 80 ألف جنيه عشان مفيش سيولة للمشروع ده.. طب ذنبا إحنا إيه!”.

ويعتقد العوضي عبده -مزارع بالقرية- أن المشكلة لن تحل لأنه: “عملنا أكتر من 100 شكوى وأكتر من محضر قى قسم الشرطة، وقابلنا كل المسئولين من المحافظ لرئيس شركة الميه، وكان الرد فى كل مرة حاضر هنجيبلكم الميه”.

بصيص أمل

بينما يرى هاني جمعة -موظف- أن هناك بصيصا من الأمل لأنه: ” في مسؤول واقف معانا اسمه رضا موافي رئيس شركة مياه نقيطة، لما عرف بالمشكلة نزل البلد الساعة 12 بالليل وساعات الساعة 3 الفجر علشان يجبلنا شوية ميه”.

في يوضح محمد سعد -أحمد أهالي القرية- أن مطلبهم الوحيد هو توصيل خط مياه بطول 1.5 كيلومتر.

خدمة وهمية

وتضيف أم يوسف -ربة منزل-: “بندفع فواتير بـ 35 و 40 جنيها، طب ندفع فلوس ليه والخدمة مش موجودة أصلاً، ولما تيجي تكلمهم يقولولك ملناش دعوة”.

ويتساءل أسامة هجرس –مزارع-: “ذنبي إيه أنا كل يوم أركب عربية كارو أو توك توك أو أمشى كيلو ونص على رجليا، عشان أجيب ميه أشرب.. ده لو بيت مسؤول كان زمانه دلوقتي بيجري وبيلف حوالين نفسه علشان الميه تبقى موجودة في البيت عنده”.

رد مسؤول

ويقول رضا موافي، رئيس شركة مياه نقيطة بمركز المنصورة، إنه رفع مذكرة بالمشكلة لمحافظ الدقهلية، مؤكداً سعيه وجميع المسؤولين لحل تلك الأزمة، موضحا أنه اقترح على أهالي القرية ورؤوسائه في العمل، استخدام مواتير لرفع المياه من أمام عزبة التسعين لدفعها بشكل كامل وسريع، مشيراً إلى أن المياه تصل مساءً لجميع البيوت لكنها ليست بالنقاء المطلوب، لذلك وفرت شركة مياه الشرب سيارة مياه شرب مُعقمة من قرية ميت فارس تحمل 12 ألف لتر مياه نظيفة للشرب تغطي احتياجات 3 قرى.

ويضيف موافي أنه يجرى العمل خلال الأيام المقبلة على تشغيل محطة المياه بمركز أجـا، التي ستساعد كثيراً في حل الأزمة والقضاء عليها تماماً.